மேற்கு சுவிஸ் மாகாணங்களில் பள்ளிகளில் ஸ்மார்ட்போன்கள் தடை

சுவிட்சர்லாந்தின் மேற்குப் பகுதியான ரோமான்டி மற்றும் தெற்குப் பகுதியான டிசினோ மாநிலங்களில் உள்ள பள்ளிகளில் 2025/26ஆம் கல்வியாண்டில் இருந்து, ஸ்மார்ட்போன் பயன்பாடு கடுமையாகக் கட்டுப்படுத்தப்படுவதாக அறிவிக்கப்பட்டுள்ளது.

ரோமான்டி மற்றும் டிசினோ மாநிலங்களின் கல்வி அமைச்சர் கூட்டமைப்பான CIIP (Conférence intercantonale de l’instruction publique de la Suisse romande et du Tessin) இதுகுறித்து அதிகாரப்பூர்வமாக அறிவிப்பு வெளியிட்டுள்ளது. இந்த முடிவு, மாணவர்களின் மனநலப் பிரச்சனைகள் அதிகரித்திருப்பது மற்றும் சமூக வலைத்தளங்களின் மீதான சார்பு குறித்து கவலை அதிகரித்ததன் பின்புலத்தில் எடுக்கப்பட்டுள்ளது.

இப்போது எடுத்துள்ள முடிவின் படி, ஸ்மார்ட்போன்கள் பள்ளிக்கூடங்களில் மட்டும் அல்லாமல் இடைவேளைகளிலும் பயன்படுத்தக்கூடாது. இது, மாணவர்களின் கவனத்திறனை மேம்படுத்தவும், சமூக ஊடகங்களில் ஏற்பட்ட அடிமைத்தனத்திலிருந்து பாதுகாப்பதற்கும் ஒரு முயற்சியாகும்.

எனினும், இந்த முடிவால் அனைத்து டிஜிட்டல் சாதனங்களும் புறக்கணிக்கப்படாது. இணைய தொழில்நுட்ப பாடங்கள், முன்னெச்சரிக்கை திட்டங்கள் (பாலியல் தொல்லை, தவறான தகவல்களிலிருந்து பாதுகாப்பு போன்றவை), மற்றும் ஆசிரியர்களால் வழிகாட்டப்படும் கல்வித் திட்டங்களில் ஸ்மார்ட்போன் பயன்படுத்த அனுமதி வழங்கப்படும்.

பல பிரஞ்சு பேசும் மாநிலங்கள்ஏற்கனவே பள்ளிகளுக்குள் ஸ்மார்ட்போன் கொண்டுவர அனுமதியில்லை என்ற போதும், இப்போது இது ஒரு ஒற்றுமையான நியமமாக அமைய உள்ளது. அந்தந்த மாநில அரசுகள், இந்த புதிய விதிகளை எவ்வாறு நடைமுறைப்படுத்த வேண்டும் என்பது குறித்த பொறுப்பை ஏற்கின்றன. 2025/26 கல்வியாண்டின் தொடக்கத்திலிருந்து புதிய கட்டுப்பாடுகள் அமலுக்கு வரும்.

இதற்காக, மாணவர்கள், பெற்றோர் மற்றும் ஆசிரியர்களுடன் உறுதிமிக்க உரையாடலுடன், விழிப்புணர்வை ஏற்படுத்தி நடைமுறைப்படுத்த வேண்டும் எனவும் CIIP வலியுறுத்தியுள்ளது. இந்த முயற்சி, பள்ளி வளாகங்களில் ஒரு கவனச்சேருமையும், நலம் சார்ந்த சூழலையும் உருவாக்கும் நோக்கத்துடன் எடுக்கப்பட்ட முக்கியமான நடவடிக்கையாகக் கருதப்படுகிறது.

@Luzernerzeitung