எதிர்மறை ஷாப்பிங் டூரிசம்: எரிபொருளுக்காக சுவிட்சர்லாந்துக்கு ஜெர்மனியர்கள் வருகை

பொதுவாக குறைந்த விலைக்காக சுவிட்சர்லாந்திலிருந்து அண்டை நாடுகளுக்கு மக்கள் செல்லும் “ஷாப்பிங் டூரிசம்” நிலைமையே அதிகமாக காணப்படும். ஆனால் தற்போது அதற்கு முற்றிலும் மாறான ஒரு போக்கு உருவாகியுள்ளது. எரிபொருள் விலைகள் உயர்ந்துள்ளதால், ஜெர்மனியிலிருந்து பலர் சுவிட்சர்லாந்துக்கு வந்து எரிபொருள் நிரப்பி செல்லும் நிலை உருவாகியுள்ளது.

ஜெர்மனியில் எரிபொருள் விலைகள் வரலாற்று உச்சத்தை எட்டியுள்ள நிலையில், சுவிட்சர்லாந்து எல்லைப் பகுதிகளில் ஒரு லிட்டர் எரிபொருள் சுமார் 30 சென்ட் வரை குறைவாக கிடைக்கிறது. குறிப்பாக துர்காவ் கன்டோனில் உள்ள Kreuzlingen பகுதியில் இந்த விலை வேறுபாடு தெளிவாக காணப்படுகிறது.

கிழக்கு சுவிட்சர்லாந்தில் செயல்படும் ஒரு எரிபொருள் விநியோக நிறுவனத்தின் தலைமை கொள்முதல் அதிகாரியான Daniel Grossheutschi தெரிவித்ததாவது, சமீப காலமாக ஜெர்மனிய வாடிக்கையாளர்களின் வருகை கணிசமாக அதிகரித்துள்ளது. “முந்தைய காலத்துடன் ஒப்பிடும்போது, ஜெர்மனியிலிருந்து வரும் வாடிக்கையாளர்கள் இரண்டு முதல் மூன்று மடங்கு வரை அதிகரித்துள்ளனர்” என அவர் கூறினார்.

ஆனால், இந்த நிலைமை சுவிட்சர்லாந்தின் அனைத்து பகுதிகளிலும் ஒன்றுபோல இல்லை. டிசினோ கன்டோனில் இதற்கு மாறான நிலை காணப்படுகிறது. அங்கு இத்தாலியில் எரிபொருள் விலைகள் குறைவாக உள்ளதால், பல சுவிஸ் மக்கள் எல்லையை கடந்துச் சென்று அங்கு எரிபொருள் நிரப்பி வருகிறார்கள்.

எரிபொருள் விலைகளில் உள்ள இந்த பிராந்திய வேறுபாடு, எல்லைப் பகுதிகளில் மக்கள் நடத்தை மற்றும் தினசரி செலவுகளிலும் மாற்றத்தை ஏற்படுத்தி வருவது குறிப்பிடத்தக்கது.